lata de ferramentas

software MANGA STUDIO e COMIC STUDIO

2011-04-27T15:36:00.001-07:00

Introducimos no noso blog o primeiro dunha serie de artigos que tratarán trucos e pequenos titoriais sobre software específico de ilustración aplicado á BD. Está claro que cada día está máis arraigado o traballo dixital, polo que non podemos deixar de lado esta ferramenta.

Para este primeiro artigo imos presentar o software COMIC STUDIO, que é un dos máis utilizados entre os artistas xaponeses. O primeiro que hai que aclarar é que COMIC STUDIO e MANGA STUDIO é o mesmo. O primeiro é como se coñece o software que a compañía CELSYS comercializa en Xapón e o segundo é a versión anglosaxoa do programa adaptado pola compañía, tamén xaponesa, E FRONTIER e que actualmente distribúe a empresa americana SMITH MICRO Software (http://manga.smithmicro.com).

A compañía CELSYS (http://www.celsys.co.jp) foi fundada no 1991 e lanzou a primeira versión do programa no 2001, pero non foi ata o ano 2006 que lanzou a versión en inglés de MANGA STUDIO, e ata o 2008 non comezou a ser comercializada por SMITH MICRO.

No momento de escribir este artigo, COMIC STUDIO vai pola versión 4.0, dispoñible para MAC e PC en tres edicións: a DEBUT, a PRO e a EX.

Por outra banda, MANGA STUDIO, que tamén vai pola versión 4, só ten dispoñibles a edición DEBUT e a EX.

Eu teño a versión en inglés (que é o CD que aparece na foto de cabeceira), e sobre esta versión faremos o resto de artigos. O programa pode conseguirse desde 50 dólares, a versión DEBUT, ata 300 dólares, a EX. A diferenza máis significativa entre as dúas versións é que na DEBUT non podes crear capas vectoriais (son mapas de bits).

pincel ZEBRA FD-801, unha curiosidade

2011-04-27T15:25:00.001-07:00

Fai uns días, na poxa dun lote de material en Xapón, conseguín facerme co pincel
ZEBRA FD-801. Ata o de agora tratamos os pinceis caligráficos e pocket de ZEBRA. Este modelo, descatalogado actualmente e do que non conseguín información ningunha na rede, é unha mestura entre os de barril e o caligráfico, coa curiosidade de que este modelo é recargable.

A compañía nipoa ZEBRA (www.zebra.co.jp) é unha das máis antigas de Xapón, fundada por Tokumatsu Ishikawa no 1897 (aínda que non sería ata o 1914 cando recibiría o nome actual). A empresa tivo a desgraza de quedar totalmente derruída nun bombardeo no 1945, aínda que volveron con forza no 1950. A empresa dedícase á fabricación de todo tipo de material de escritura, e sería no 1975 cando empezaría a fabricar os primeiros pinceis dos que imos falar agora.

O modelo FD-801 ten punto de pelo sintético (non é de feltro como os de barril), e utiliza recargas das pequenas (neste punto é similar a outros modelos pocket recargables). O raro é que combina estas características cun tamaño excesivo, xa que ten un mango demasiado longo.

OPINIÓN PERSOAL:

Eu son asiduo ao uso dos pinceis ZEBRA en xeral (sobre todo os de barril), e aínda que este modelo non se poida atopar facilmente, desde logo ten un bo rendemento e ofrece a calidade e fiabilidade da marca.

customizando os CONVERSE

2011-04-27T15:18:00.001-07:00

Para continuar coa celebración dos 25 artigos, subo un documento gráfico sobre o proceso de customización dunhas zapatillas CONVERSE. Nos seguintes artigos voltaremos aos nosos temas habituais. Espero que vos guste.

25 artigos!

2011-03-22T08:53:00.001-07:00

Para celebrar as 25 entradas no noso blog Lata de Ferramentas, fixen unha autocaricatura na que intento representar o espírito do blog. Levaba algún tempo traballando na idea e acabei por asumir o aspecto do meu can, o Dr. Watson, cargado das ferramentas máis habituais coas que traballo. Espero que vos guste e que poidamos celebrar pronto as 50 entradas.

portaminas PENTEL GRAPHGEAR 1000

2011-03-22T08:49:00.001-07:00

Para o primeiro artigo sobre portaminas decidín falar do PENTEL GRAPHGEAR da serie 1000, xa que, ademais de ser moi doado de atopar en calquera tenda de belas artes ou papelaría, aínda non atopei outro que rendese mellor que este.

PENTEL CO. LTD. (www.pentel.co.jp) é unha compañía xaponesa fundada en 1946 e con sede en Toquio. A empresa especializouse nos seus comezos en produtos de escritura (bolígrafos e portaminas), pero a día de hoxe adícase tamén aos produtos electrónicos, cosméticos ou de papelaría.

Os portaminas son de corpo metálico, cunhas almofadas de plástico suave para agarralos. O máis interesante é que resgardan a punta de 4 mm dentro do corpo do portaminas cando non se usa, usando como mecanismo de apertura o clip de suxeición do portaminas.

Tamén dispoñen de selector de dureza, e dunha goma bastante decente na parte superior (debaixo do capuchón) da que venden recambios.

Quizais non é doado atopar todos os modelos, pero están dispoñibles nos seguintes diámetros: 0,3 mm (de cor vermella), 0,4 mm (de cor verde), 0,5 mm (de cor gris), 0,7 mm (de cor azul) e 0,9 mm (de cor amarela).

OPINIÓN PERSOAL:

De lonxe, os mellores portaminas cos que traballei, sendo dos poucos modelos que permiten resgardar a punta para evitar roturas en caso de caídas ou golpes. O meu favorito é o de 0,4 mm, que combino con minas 2B ou 3B, das que xa falaremos noutro artigo. O prezo é duns 15 euros por unidade e atópanse facilmente (sobre todo o de 0,5 mm).

pinceis pocket de PLATINUM

2011-03-22T07:50:00.001-07:00

Voltamos con outro artigo máis sobre pinceis pocket.

Desta vez falaremos dos pinceis de PLATINUM, quizais menos habituais e de menor proxección que os de outras marcas.

A compañía nipona PLATINUM PEN CO. LTD. (http://www.platinum-pen.co.jp) foi fundada no 1919 por Syunchi Nakata e adícase en exclusiva aos produtos de escritura, destacando pola calidade no deseño e acabamentos das súas plumas estilográficas.

Os modelos dispoñibles son os seguintes:

- CF-5000 é o modelo de gama alta, con acabamentos en mármore sobre corpo de aluminio. É o único modelo que ten a cabeza do pincel de pelo natural de marta (ten 3 variantes: negro, azul e vermello).

- CF-4000 é una edición especial con motivos xaponeses no seu corpo, a cabeza do pincel é de pelo sintético. Os dous modelos son: Crane & Sunrise e o Mt. Fuji & Cherry Blossoms.

- CF-3000 ten o corpo negro e con pequenos detalles en aluminio.

- CF-2000 é exactamente igual que o modelo CF-4000, pero co corpo totalmente en negro.

- CFTR-250C é o modelo económico, co corpo de resina e con motivos florais dourados gravados no seu corpo de cor negra. O modelo é coñecido como SEIGA.

Todos os pinceis son recargables, usan as recargas SPF 200 de 1,2 cm³ e veñen 3 cartuchos en cada caixa. (As recargas só están dispoñibles en cor negra.)

OPINIÓN PERSOAL:

Desta vez, temos uns pinceis que destacan máis polos seus acabamentos de alta gama que pola súa utilidade. Salvo o modelo máis económico, o resto de modelos varía entre os 40 e os 60 euros. O modelo CF-5000 é de recente aparición, polo que este modelo aínda non tiven a oportunidade de probalo, pero do resto de modelos eu quedo cos de alta gama de KURETAKE.

revista COMICS DRAWING

2011-01-25T18:07:00.001-08:00

COMICS DRAWING é unha revista especializada en BD xaponesa. A revista é parte da liña MOOK da editorial SEIBUNDO (www.seibundo-shinkosha.net), tamén responsable de moitos outros libros de documentación para ilustradores.

A revista foi editada entre o 2008 e o 2009 e só teño constancia de que chegara aos 5 números (polo menos os que eu teño). Na páxina web da editorial tampouco se atopan novas sobre ela.

A revista é de tamaño A4, con lombo encolado e papel de alta calidade (satinado e de gramaxe alta), o que fai destacar as fotos e ilustracións. A extensión da revista é dunha media de 130 páxinas.

No interior pódense atopar artigos variados con autores e editores de todos os estilos, mostras do seu traballo e titoriais de debuxo.

Entre os autores entrevistados temos a xente como Masayuki Ishikawa, Okama, Fumiko Tanikawa, Yaeko Ninagawa, Hiromu Arakawa, Yuki Shimizu, Kendi Oiwa, GIN Toriko, You Higuri, Norie Yamada, Redjuice, Makoto Yukimura, HUKE, Mori Kaoru, CHOKO, Hiroaki Samura ou Seimu Yoshizaki.

O seu prezo é de 1 500 iens e non son moi doadas de atopar.

OPINIÓN PERSOAL:

Ao igual que coa revista COMICKERS (da que xa falaremos máis adiante), estamos ante unha das mellores maneiras de coñecer as técnicas e materias preferidos dalgúns dos autores máis punteiros do manga. Normalmente, todos os titoriais traen unha primeira sección onde se mostran todos os materiais usados nel, sendo esta unha das miñas partes favoritas.

Outras das seccións máis interesantes son as que nos ensinan os estudios de traballo dos artistas, cunha morea de fotos de moi boa calidade onde podes ver dende a súa mesa de traballo ata detalles dos estantes de documentación.

Tamén é chamativo poder observar o resultado final de cada páxina, xa que non é doado atopar moitas exposicións de autores manga nos salóns de BD, e só tes como referencia o resultado final impreso.

A revista non leva excesiva publicidade e limítase a publicacións similares da editorial, escolas de manga xaponesas ou programas de debuxo dixital.

Unha boa opción para adentrarte na parte máis técnica do mundo do manga.

escobilla de plumas UCHIDA

2011-01-25T17:46:00.001-08:00

Neste artigo imos falar dunha ferramenta considerada unha auténtica icona do mundo da BD xaponesa, a escoba de plumas. Esta ferramenta está asociada aos mangakas ao mesmo nivel que a pluma G, como se pode ver na imaxe inferior de BAKUMAN, a creada por Tsugumi Ohba e Takeshi Obata para a revista SHONEN JUMP.

UCHIDA YOKO CO. LTD. (www.uchida.co.jp) é unha compañía chinesa, fundada no 1910 por Kotaro Uchida, especializada en consumibles de oficina e actualmente establecida no mercado europeo e americano.

As escobas son de dous tamaños (os que vedes na foto de portada) e están formadas por plumas de pato grampadas a un mango de plástico. A escoba serve para limpar todos os residuos que deixamos ao traballar, como os restos das gomas de borrar ou das tramas mecánicas raspadas.

OPINIÓN PERSOAL:

Esta ferramenta é moi similar e ten a mesma funcionalidade que outras escobas de pelo que podemos conseguir nas tendas de belas artes. De feito, son dunha calidade moi baixa (aínda que hai que ter en conta que a queremos para limpar residuos).

aerógrafo ABS de COPIC

2011-01-25T17:36:00.001-08:00

Imos cunha das ferramentas máis curiosas que ofrece TOO para os seus rotuladores COPIC, o aerógrafo ABS (airbrush system).

A compañía xaponesa TOO CORPORATION (www.too.com/copic/) foi fundada en 1919 en Toquio, pero non sería ata 1987 cando comeza a distribuír e vender os rotuladores COPIC, polo que se faría mundialmente coñecida entre os usuarios de ferramentas de debuxo.

O aerógrafo véndese en tres formatos, ABS1, ABS2 e ABS3. Todos os modelos teñen en común o AIR GRIP, que é a peza que emula o aerógrafo tradicional onde inserimos o rotulador COPIC.

O modelo máis básico (ABS3) leva outra peza chamada AIR ADAPTOR que permite conectar o ABS a un compresor externo, que che facilita un tempo ilimitado de uso.

O modelo (ABS2) leva unha botella de aire comprimido chamada AIR CAN D60 e proporciona uns 10 minutos de uso.

O modelo máis completo, o que vemos na imaxe de portada (ABS1), leva o AIR ADAPTOR e a botella de aire comprimido. Este modelo leva unha botella de maior capacidade chamada AIR CAN 180 e proporciona 45 minutos de uso.

No catálogo americano podemos atopar 3 DVD con titoriais sobre o aerógrafo.

O prezo dos aerógrafos vai dende os 30 euros ata os 100 euros, dependendo do modelo.

OPINIÓN PERSOAL:

Pola banda positiva hai que dicir que, unha vez que fas un investimento importante nos rotuladores, o aerógrafo permíteche sacarlles o máximo proveito, sobre todo para facer fondos e paisaxes. Ademais, conta coa calidade á que nos ten acostumados TOO.

Pola banda negativa temos a preguiza de ter que traballar con máscaras para protexer o resto do debuxo e o aborrecemento de ter que usar as botellas de aire comprimido ou un compresor conectado á rede eléctrica.

pinceis caligráficos de ZEBRA

2011-01-17T14:13:00.001-08:00

Nesta ocasión faremos un pequeno artigo sobre os pinceis caligráficos de ZEBRA, onde a calidade destes fai que non botemos en falta máis modelos.

Os únicos dous modelos dispoñibles son:

FDS-5B1: pincel de tamaño pequeno, cunhas medidas de 184 mm de lonxitude, 13 mm de diámetro e un peso de 16 g.

FDM-5B1: pincel de tamaño mediano e co resto de características totalmente iguais ao anterior modelo.

Como case todos os pinceis caligráficos, estes dous modelos son recargables. Neste caso, a recarga é de tinta chinesa negra e todo o mango é de cor marrón. A mesma recarga serve para os dous modelos, a FDC-150.

OPINIÓN PERSOAL:

Como comentaba ao comezo do artigo, temos pouca variedade de modelos, pero contamos coa calidade do material que ofrece ZEBRA.

feliz ano novo

2011-01-15T06:34:00.001-08:00

Cerditos de Guinea e LDF vos desexa feliz ano novo. Esperamos poder seguir subindo outra boa tanda de artigos interesantes.

rotuladores NEOPIKO 2 de DELETER

2010-11-08T05:04:00.001-08:00

DELETER INC (www.deleter.jp) é unha compañía xaponesa recente, fundada no 1984 e especializada na comercialización de material de debuxo económico para manga. Aínda que fabrica moito material de baixa calidade (comparado con outros competidores), o feito de ter como único obxectivo o mundo do debuxo fai que poidas atopar no seu catálogo ferramentas moi específicas para cada traballo.

Destaca sobre todo polo seu fondo de tramas mecánicas (con máis de 600 modelos). Outra das características deste fabricante é a súa incursión no mercado americano e europeo, facendo que os seus produtos sexan facilmente localizables.

Os rotuladores, tamén chamados marcadores (marker en inglés, por se os buscades en tendas en liña), foron creados en 1962 polo xaponés Yukio Horie. A día de hoxe os rotuladores profesionais (nada que ver cos comercializados en grandes superficies) destacan pola súa enorme gama de cores e a súa versatilidade twin (puntas de diferentes formas en cada extremo). Todos eles teñen en común a súa tinta non permanente con base de alcol e a posibilidade de encherse nalgúns casos.

Neste caso falaremos dos NEOPIKO 2. Estes rotuladores teñen dobre punta, por un lado punta de cuña e polo outro punta de pincel. A gama de cores é de 144 e pódense adquirir soltos ou en paquetes de 12, 24, 36 ou 72 rotuladores.

Como comentabamos arriba, estes rotuladores pódense reencher, pero as tintas so están dispoñibles no catálogo xaponés. Por outra banda, o que si que non é intercambiable nin substituíble son as puntas.

OPINIÓN PERSOAL:

Cando falamos de que DELETER fabrica bastantes materiais de baixa calidade referímonos, entre outros, aos rotuladores NEOPIKO 2. Estes rotuladores teñen un acabamento bastante malo; de feito, é normal desmontar o rotulador ou quitar a tapa. Ademais, ten un aro rugoso no lado da punta de pincel que fai incómoda a suxeición do rotulador. Algúns deles veñen defectuosos de fábrica, coa tinta un pouco seca ou as puntas desgastadas. Pero non todo é negativo nestes marcadores, xa que con paciencia se lles pode sacar un bo partido e son ideais para comezar a practicar.

Non é necesario mercalos todos, xa que ha icores que son case iguais entre elas ou que son tan claras na gama que apenas se ven. Os rotuladores son accesibles, xa que cada un vale uns 3 dólares (cantidade ridícula se pensamos nos 7 euros que vale un COPIC SKETCH).

papel FANBOY de CANSON

2010-11-08T04:19:00.001-08:00

CANSON (http://www.canson-infinity.com/) é unha compañía francesa fundada no 1557 e especializada na fabricación de papel. A empresa recibiu o título de Manufactura Real no 1784 da man de Luís XVI e, como curiosidade, foron os creadores do primeiro globo aerostático, feito de papel e de onde ven o logotipo da compañía.

Neste artigo veremos o ramo FANBOY (http://www.fanboypaper.com/), ramo de CANSON especializado na fabricación de papel para banda deseñada.

Os modelos que trataremos divídense segundo o estilo de debuxo. Por unha banda temos o especializado en comic book americano con dous modelos:

COMIC BOOK ART BOARDS. Trátase dun bloc encolado de 24 follas de 250 g, libre de ácidos, en formato 27,9 x 43 cm que vén preparado con guías en azul non reproducibles, varias marxes adaptadas ao formato comic book dos EUA e espazo para a identificación da páxina, autor, data e esas cousas.

COMIC BOOK COVER SHEET. Ten as mesmas características que o anterior, pero con diferentes marcas para as ilustracións sen marxes e con espazo para o logotipo da editorial, o título do cómic e o código de barras.

A outra opción son os blocs pensados para o debuxo de estilo manga, onde temos o modelo MANGA ART BOARD, un bloc encolado de 15 follas de 250 g, libre de ácidos, en formato 25,4 x 36 cm. Vén preparado con guías en azul non reproducibles e varias marxes adaptadas ao formato manga xaponés.

A maiores, dispoñen dun bloc pensado para tiras de humor gráfico chamado COMIC STRIP BOARDS, 14 follas das mesmas caracte-rísticas comentadas antes e cun formato 12,7 x 43 cm.

Deixaremos para unha segunda parte os modelos complementarios desta gama, pensados para os bosquexos ou planificacións de páxina.

OPINIÓN PERSOAL:

A verdade é que non é doado atopar papel específico para a banda deseñada. Aínda que tamén é certo que moitas das prestacións non parecen importantes, o feito de ter as marxes feitas, guías milimetradas e a calidade do mesmo papel para traballar con pluma, pincel ou rotulador fan del unha boa opción para traballar. Pola parte negativa, quizais queda esaxerado a gramaxe de 250 gsm (sobre todo se non aplicas cor manual) e o prezo, que anda polos 20 euros por bloc.

tinta PEN WHITE de DR PH MARTINS

2010-10-10T15:44:00.001-07:00

DR PH MARTINS é o nome que recibe a gama de produtos que fabrica a empresa estadounidense SALIS INTERNACIONAL INK, que dende que foi fundada no 1934 se adica en exclusiva ás tintas líquidas de cores; sendo a súa gama BOMBAI INK a máis coñecida. Curiosamente, aínda sendo americanos, os produtos de DR PH MARTINS son de uso común no mercado xaponés.

Neste caso imos falar dunha das tintas brancas dispoñibles no seu catálogo, a PEN WHITE, pensada para o seu uso en estilógrafos, plumas e aerógrafos polas súas características específicas: é máis líquida que as outras tintas brancas do mercado (que son similares ás témperas).

A tinta vén presentada nun bote de cristal de 30 ml e con sistema de contagotas no tapón (para poder reencher cartuchos de estilógrafos de forma doada).

Na imaxe inferior podedes ver unha mostra da tinta aplicada cunha pluma G PEN de TACHIKAWA sobre un debuxo tintado co pincel de barril fino de ZEBRA.

OPINIÓN PERSOAL:

Curioso produto con poucas variantes no mercado o que ofrece DR PH MARTINS. Hoxe en día podemos atopar unha ampla variedade de tintas brancas, pero non tan líquidas como para aplicar con outras ferramentas que non sexa o pincel. No meu caso, permíteme precisar liñas e textos sobre fondos negros usando a pluma. Iso si, nin é moi barata (sobre 10 euros o bote) nin moi fácil de atopar.

pinceis de barril BAMBOO de AKASHIYA

2010-10-10T15:34:00.001-07:00

Caso curioso o do pincel de barril BAMBOO de AKASHIYA, xa que é moito máis parecido a un pocket que aos clásicos pinceis de barril actuais.

AKASHIYA (www.akashiya-fude.co.jp) é unha marca xaponesa adicada única e exclusivamente á fabricación de pinceis. A empresa, que non supera o medio centenar de traballadores, foi fundada en 1624 e actualmente está asentada en Toquio.

O modelo da foto de cabeceira do artigo é o AK-1500TRD, pero as características dos pinceis son as mesmas, variando só o aspecto exterior do mesmo. Os pinceis son recargables (o modelo da recarga é o SKI-200 e vén en paquetes de 3 cartuchos de tinta resistente á auga). O corpo do pincel é de madeira de bambú e ten un bo acabamento.

Hai dispoñibles máis de 40 modelos, case todos coa cor natural do bambú, no que hai gravados diferentes motivos, como os animais do horóscopo chinés ou plantas tradicionais xaponesas. A maiores, dispoñen de dous modelos co corpo pintado, un negro e o outro vermello. A partir de aquí, pódense elixir diferentes opcións respecto á presentación do pincel, dende o máis básico no seu envoltorio de plástico ata os que veñen en caixas e traen fundas de cores.

Outra opción dispoñible na web é a de personalizar o pincel, gravando o teu nome ou decorando con motivos propios o bambú exterior.

Na foto inferior podedes ver comparados o BAMBOO e o THIN LINE (tamén de AKASHIYA), no que se aprecia a diferenza no trazo. Tamén os resultados de aplicar un pincel de auga por riba das liñas para comprobar que, efectivamente, as súas tintas son resistentes á auga.

OPINIÓN PERSOAL:

Se non se pode negar que é un pincel de aspecto moi chamativo e cun acabamento de calidade, tamén é verdade que o pincel ten pouco definidas as serdas; conseguindo trazos moi anchos e sendo difícil afrontar os pequenos detalles do debuxo, o que o limita a facer debuxos en grandes formatos. Outro punto negativo é que a tapa do mesmo non encaixa na parte traseira do corpo: normalmente este detalle axuda a nivelar o peso do pincel e, ademais, tes menos opcións de perdela. Por outra banda, o pincel é moi lixeiro, o que fai que a man non canse moito cando traballas con el. O BAMBOO de AKASHIYA pódelo atopar en tendas en liña dende os 15 euros ata os 50 euros.

pincel pocket COPIC GASENFUDE

2010-10-01T14:50:00.001-07:00

Novo artigo sobre pinceis pocket, nesta ocasión falaremos do único modelo que ofrece a marca COPIC.

A compañía xaponesa TOO CORPORATION (www.too.com/copic/) foi fundada en 1919 en Toquio, pero non sería ata 1987 cando comeza a distribuír e vender os rotuladores COPIC, polo que se faría mundialmente coñecida entre os usuarios de ferramentas de debuxo.

O pincel pocket COPIC GASENFUDE non é recargable, as serdas da cabeza son de nailon e o seu aspecto externo e moi similar ao do PENTEL. A súa principal calidade é a súa resistencia aos rotuladores COPIC. Na seguinte imaxe pódese ver a ilustración de BULMA tanto a lapis, como tintada co pincel de COPIC e coloreada cos SKETCH.

OPINIÓN PERSOAL:

Antes de nada hai que sinalar que estes pinceis só están dispoñibles no catálogo xaponés e son moi difíciles de atopar. Tampouco é que nos acheguen grande cousa, xa que, ao igual que a pluma DRAWING PEN, teñen un acabamento moi pobre. O prezo do pincel anda polos 4 euros.

pinceis pocket de ZEBRA

2010-09-01T15:41:00.001-07:00

Despois de falar dos pocket de TOMBOW, imos falar agora dos pocket de ZEBRA.

Os modelos dispoñibles son os seguintes:

O WF3 é o modelo co tamaño de pincel medio, o seu corpo é de cor negra, pesa 9 g e mide 14 cm de longo. Coas mesmas dimensións temos o WF1, de punta fina e corpo de cor gris, e o WFSS4, de punta superfina e corpo de cor azul.

Tamén temos dispoñible un modelo de dobre punta, o WFT5, de dimensións similares aos anteriores e o corpo de cor vermella (este modelo ten a punta media e a fina).

Por último, temos un modelo (que eu non teño) que é o P-WF1-GR. Este pincel é de tinta cincenta e o corpo de cor branco. O tamaño do pincel é o fino.

Os prezos dos pinceis andan entre os 2 e 4 euros.

Na imaxe inferior podedes ver o proceso de creación dunha ilustración de Yasuhiro Nightow para a súa serie Trigun (publicada na Shonen Captain entre o 1995 e 1997), na que o autor se serve do WF1 para detallar os bordos.

OPINIÓN PERSOAL:

Aínda que non me gusta moito o acabamento destes pinceis, e me parecen moito mellor os TOMBOW, hai que recoñecer que a opción do pincel superfino e a calidade dos mesmos fan destes pocket unha importante ferramenta. O seu prezo baixo fai que non se bote de menos o feito de que ningún deles sexa recargable. Outra pega que teñen é que non dispoñen dun modelo suave, polo que hai que facer bastante presión para conseguir os trazos anchos, o que fai que sexa máis difícil traballar con rapidez.

rotuladores calibrados COPIC multiliner

2010-09-01T15:35:00.001-07:00

Para o primeiro artigo adicado aos rotuladores calibrados, elixín os COPIC MULTILINER de TOO, onde temos dous modelos, os recargables e os que non.

Para cada un deles existen múltiples variantes que imos analizar agora. Destacan, por riba de todas as súas cualidades, a resistencia aos rotuladores ao alcohol; que, evidentemente, é o produto estrela desta marca e todos os demais complementos xiran arredor deles.

A compañía xaponesa TOO CORPORATION (www.too.com/copic/) foi fundada en 1919 en Toquio, pero non sería ata 1987 cando comeza a distribuír e vender os rotuladores COPIC, polos que se faría mundialmente coñecida entre os usuarios de ferramentas de debuxo.

Comezaremos polos COPIC MULTILINER, onde temos dúas opcións:

- Os COPIC MULTILINER de cores teñen 5 diámetros (0.03, 0.05, 0.1, 0.3 e 0.5 mm) e están dispoñibles en sepia, viño, cobalto, gris e oliva.

Os COPIC MULTILINER de tinta negra teñen máis diámetros (0.03, 0.05, 0.1, 0.3, 0.5, 0.8 e 1.0 mm). A maiores, hai dous modelos con punta de pincel (pequeno e mediano).

- Na outra banda temos os COPIC MULTILINER SP, que son recargables e onde tamén temos dúas opcións: os COPIC MULTILINER SP de cores teñen só o diámetro de 0.3 mm e o de punta de pincel. As cores dispoñibles son: vermello, púrpura, rosa, viño, sepia, laranxa, amarelo, turquesa, oliva, azul ceo, cobalto e gris frío.

Os COPIC MULTILINER SP de tinta negra son o modelo co maior número de diámetros (0.03, 0.05, 0.1, 0.2, 0.25, 0.3, 0.35, 0.5 e 0.7 mm). A maiores, hai un modelo con punta de pincel.

Na gráfica podedes ver todos as opcións e referencias, tanto dos rotuladores, coma das recargas. Outra curiosidade destes últimos modelos é que as puntas tamén son substituíbles, podendo aproveitar o resto no caso de que rompa a punta nun accidente.

Tamén venden unha ferramenta (nib changers) que serve para substituír as recargas.

OPINIÓN PERSOAL:

A verdade é que son rotuladores con múltiples opcións, pero bastante caros, xa que case todo o que fabrica COPIC ten prezos bastante elevados. Os non recargables teñen un acabamento pobre e, ademais, resultan tan bos como calquera outro (este tipo de ferramenta sécase con facilidade). Por outra banda, tampouco son de moito uso a cantidade de cores que ofrecen, polo que case que quedaría co modelo de pincel dos COPIC MULTILINER SP, o cal nos pode vir ben para encher zonas negras.

pinceis de barril de PILOT

2010-09-01T15:31:00.001-07:00

Este é o primeiro artigo sobre este tipo de pinceis. Con este modelo, xa vimos os tres modelos nos que englobarei os artigos: pocket, caligráfico e de barril.

Normalmente este tipo de pincel é de feltro, aínda que se poden atopar algúns modelos de pelo. Outras das características son que o corpo é de cor marrón e non son recargables.

Comezaremos por PILOT, xa que, aínda que non é unha marca que destaque pola súa variedade, podemos atopar produtos de moi boa calidade.

PILOT (www.pilot.co.jp) foi fundada por Ryosuke Namiki, creador da punta dourada para estilográficas, no 1918 baixo o nome de Namiki Manufacturing Co.

Máis tarde, 20 anos despois, a compañía cambia o nome por Pilot Pen Co., Ltd., converténdose nunha das marcas de maior prestixio na fabricación de material de debuxo.

Temos catro modelos de pincel:

- O SN-30FM-B é o pincel de feltro de trazo máis fino (co corpo máis delgado de cor marrón).

- O SN-30KS-B é un dos casos menos habitual, un pincel de pelo, de trazos máis finos que o anterior, pero máis imprecisos tamén (co corpo de cor marrón).

- O SN-20FS-B é o pincel de feltro de trazo medio (co corpo de cor negra).

- E, por último, o SFN-30FS-B que é o de dobre punta. Este último modelo non o teño e non aparece nas mostras de abaixo, pero ofrece o mesmo trazo que os dous modelos de feltro.

OPINIÓN PERSOAL:

Eu son dos que prefire os modelos de feltro aos de pelo, polo que estes pinceis me parecen moi fáciles de usar. Pode que non teñan os deseños máis atractivos, pero o acabamento é moi similar ao de calquera outra marca. Ademais, a calidade das puntas é máis que aceptable e tampouco é un material moi caro, xa que os prezos varían entre 2 e 3 euros.

pinceis pocket TOMBOW

2010-09-01T15:26:00.001-07:00

Imos co primeiro artigo sobre pinceis de peto (pocket), e, para empezar, falaremos dos modelos da marca TOMBOW, responsable das gomas de borrar que vimos nun artigo anterior.

Estes pinceis destacan xeralmente por non seren recargables; pero, por outra banda, ofrecen trazos moi precisos coa súa pequena punta flexible.

TOMBOW PENCIL CO. LTD. é a responsable da súa fabricación (http://www.tombow.com/). A empresa, fundada en Toquio no 1913, tiña como principal actividade a fabricación de lapis, aínda que nos anos 50 comeza coa fabricación de bolígrafos e demais accesorios. Nesta última década expandiuse tamén a outros países como Tailandia ou Vietnam.

Neste caso temos dous modelos básicos: o GCD-111 (de cor azul e punta dura) e o GCD-112 (de cor verde e punta branda). O corpo do pincel é de polipropileno reciclado e proporciona un tacto agradable ao collelo. Os dous pinceis son de tinta negra e non recargables. Están dispoñibles a partir de 2 euros.

A maiores, hai outro modelo de dobre punta GCD-121 (de cor gris e punta dura), no que un dos lados permite debuxar en negro e o outro en gris.

Cada pincel ven no seu envase acompañado dun patrón para caligrafía xaponesa. Na ilustración inferior podedes ver este esbirro da RED RIBBON tintado co modelo GCD-112 e coloreado cos COPIC SKEETCH.

OPINIÓN PERSOAL:

Dentro da multitude de pinceis pocket, os fabricados por TOMBOW teñen o mellor deseño e acabado na relación calidade/prezo. O modelo GCD-112 é o que mellor resultado dá, xa que nos modelos de punta dura (que adoitan ser case todos) e máis difícil sacar a variación de liña. Ademais, respectando os tempos de secado, pódenselle aplicar rotuladores ao alcohol.

Un gran pincel que non falta na miña lata de ferramentas.

pinceis caligráficos de PENTEL

2010-08-10T05:07:00.001-07:00

É agora a quenda dos pinceis caligráficos de PENTEL; os cales, sinceramente, son moi parecidos aos analizados no artigo sobre os pinceis PILOT, salvo que os PENTEL nos ofrecen unha ampla e variada gama de modelos. Nela imos diferenciar os XFL2 (de tinta negra) e os GFL (pinceis de cores).

Debemos aclarar que nestes dous artigos estamos a falar só dos pinceis recargables de grande formato (xa que as dúas marcas comercializan multitude de modelos, mais que veremos noutros artigos).

PENTEL CO. LTD (www.pentel.co.jp) é unha compañía xaponesa fundada en 1946 e con sede en Toquio. A empresa especializouse nos seus comezos en produtos de escritura (bolígrafos e portaminas), pero que a día de hoxe se adica tamén aos produtos electrónicos, cosméticos ou de papelaría.

O pincel caligráfico recargable de PENTEL dispón dunha cabeza formada por serdas de fibra de nailon. En todo o seu conxunto ten 18 cm de longo e pesa 12 g.

Para poder usalo por primeira vez, tedes que quitar a arandela de cor que se encontra na virola (a unión entre o mango e a cabeza) e logo deixar que a tinta suba, por absorción, ata as serdas. Ao igual que nos PILOT a recarga é todo o mango.

No caso dos GFL, dispoñemos de 18 modelos. Na gráfica inferior podedes ver a súa carta de cores (o primeiro numero é o código do pincel e o segundo o código da recarga).

Neste caso o tamaño das serdas é estándar para todos, cunha medida intermedia e similar ao XFL2L.

O método para conseguir variedade de cores con estes 18 pinceis é similar á que se usa nos rotuladores, utilizando o negro (#101) para escurecer a cor orixinal ou mollalos en auga para conseguir cores máis claras.

Os modelos XFL2 non están dispoñibles no mercado americano e europeo, só a versión POCKET GFKP e os COLOR BRUSH GFL mencionados antes, polo que conseguir todos os modelos existentes é bastante complicado.

Podemos destacar que: o XFL2F é o modelo máis fino, pero non por iso o máis preciso, (capuchón azul claro) e o seu oposto é o XFL2B (capuchón verde), que ten un trazo ancho e espeso.

Por último, dispoñemos de recargas en cada un dos diversos modelos, sendo a máis común a XFR-AD. Os prezos dos pinceis varían entre os 5 e 10 euros.

O resto de modelos desta segunda lista son aínda máis raros; pero, aínda así, o único que non teño é o XFRH-MN ,que é de cor azul.

OPINIÓN PERSOAL:

Como dicía ao comezo do artigo, non hai diferencia entre estes pinceis e os PILOT, salvo que no caso de PENTEL te podes perder entre as súas múltiples variedades, sen sacar nada en limpo. Temos dende o XFP9L, vermellón segundo a publicidade e laranxa butano na realidade, ata o FL3L, dunha cor cinsenta e sucia. Outro modelo ao que tampouco lle collo o xeito é o FP5F, demasiado seco e pouco flexible.

Pola contra, os meus favoritos (entre todos os modelos, PILOT engadidos) son o FP6L e o FP5M, onde consegues trazos precisos

tintas DELETER

2010-08-10T04:17:00.001-07:00

DELETER INC (www.deleter.jp) é unha compañía xaponesa recente, fundada no 1984 e especializada na comercialización de material de debuxo económico para manga.

Aínda que fabrica moito material de baixa calidade (comparado con outros competidores), o feito de ter como único obxectivo o mundo do debuxo fai que poidas atopar no seu catálogo ferramentas moi especificas para cada traballo.

Dentro desa enorme variedade de ferramentas, atopamos a tinta líquida. Esta componse de carbón vexetal moi finamente moído, que se amazoca e compacta con algún tipo de pegamento con base acuosa, como resinas vexetais ou algúns extractos animais.

Co carbón moído e o pegamento fórmanse unhas barras pequenas con forma de lingote que se prensan e se deixan secar ata alcanzar unha consistencia totalmente sólida.

Esta tinta en estado sólido pode durar anos ou séculos sen perder as súas propiedades.

A calidade da tinta depende de moitos factores, como a madeira da que provén o carbón, o proceso de prensadura, o pegamento utilizado, o tempo que ten, etc. Para preparar tinta líquida a partir destas barras hai que fretalas contra unha pedra rugosa especialmente deseñada para tal efecto chamada en xaponés SUZURI. Estas pedras, de diversas formas e aspectos, teñen todas en común que están compostas dun material rugoso e teñen unha cavidade. Sobre estas pedras vértese un pouco de auga e sobre elas frétase a barra, de maneira que sempre estea húmida. O continuo fretamento sobre a pedra coa auga vai desfacendo aos poucos a tinta, que vai quedando disolta na auga que se acumula na cavidade.

No caso das tintas de DELETER, temos 6 modelos de tinta negra e 2 de tinta branca.

A tinta BLACK 01 é especial para liñas de debuxo, a BLACK 02 mantén o seu ton escuro, incluso despois de borrar por riba dela; a BLACK 03 é resistente á auga e ten un acabamento mate; a BLACK 04 é resistente á auga e ten un acabamento con brillo; a BLACK 05 ten acabamento brillante e é idónea para o uso dos rotuladores ao alcol. Por último, a BLACK 06 é de secado rápido.

Pola outra banda, a WHITE 01 é normal e a WHITE 02 é resistente á auga e de secado rápido.

OPINIÓN PERSOAL:

A verdade é que para ser de DELETER (una compañía onde destacan os seus produtos por ser dunha calidade media-baixa), os modelos de tinta manteñen as propiedades comentadas máis arriba e por uns 4$ podes ter un bote de 30 ml.

Eu uso bastante a BLACK 05 e BLACK 02. En cambio prefiro a OPAQUE WHITE de COPIC (da que falamos nun artigo anterior) antes que as WHITE de DELETER.

DVD other hand INOUE TAKEHIKO

2010-08-10T04:10:00.001-07:00

Aínda que non fixen ningún artigo sobre ela, a documentación é unha das miñas partes favoritas do proceso de aprendizaxe e preparación. Polo que, entre tanta ferramenta, irei intercalando algún artigo relacionado con publicacións escritas ou audiovisuais relacionadas coa banda deseñada.

Neste caso imos falar do DVD de Takehiko Inoue OTHER HAND.

Takehiko Inoue (http://www.itplanning.co.jp/) naceu na cidade xaponesa de Kyūshū, o 12/01/1967. O seu primeiro éxito veu da man da obra KAEDE PURPLE (2 tomos publicados no 88), co que conseguiu o premio TEZUKA SHOW. Logo traballou uns meses como asistente de Tsukasa Hōjō, autor de CITY HUNTER (e do que se lle pegaría o estilo nas seguintes obras).

A partir dos anos 90, chegaría a súa obra máis coñecida SLAM DUNK, o manga máis vendido da historia do Xapón ata a chegada dos NARUTO, NANA e ONE PIECE.

Despois dos 31 tomos dos que consta a obra, intentouno de novo con outros 4 tomos da mesma temática, pero de corte futurista, chamada BUZZER BEATER. Pero non sería ata o 1998, cando comezou a publicar VAGABOND, unha obra baseada na vida do samurai Musashi Miyamoto, que volvería gañar o favor do público e a critica.

A día de hoxe, combina esta última obra, da que leva 33 tomos, con outra de ton persoal e intimista chamada REAL, da que leva 8 tomos.

Entre os seus últimos traballos temos, entre outros, o deseño de personaxes do videoxogo da XBOX 360 LOST ODYSSEY.

O DVD divídese en dúas partes: nunha podemos ver os 4 anuncios que Inoue fixo para a empresa SHISEIDO UNO, empresa xaponesa de cosméticos, no 1998.

Na outra parte temos o groso do contido, onde se alternan entrevistas co autor e os making-of do mural de VAGABOND que debuxou en KINOKUNIYA, unha libraría de tres planta situada no medio de Nova York, que se levou a cabo en novembro do 2007.

A rodaxe dos tres anuncios de SHISEIDO UNO nos que participa (o que é totalmente animado non ven).

Nunha reportaxe do evento conmemorativo de SLAM DUNK 10 DAYS AFTER, debuxou no 2004, sobre 23 taboleiros do instituto MISAKI da prefectura de Kanagawa, un derradeiro capítulo da serie para celebrar os 100 millóns de exemplares vendidos.

Por último, tamén podemos ver a Inoue debuxando e tintando unha páxina completa de VAGABOND no seu estudio. (Este fragmento está, a súa veza collido doutro DVD chamado DRAW.)

Incorporamos ao blog un reprodutor de vídeo, na nosa nova aplicación (na columna da dereita) podedes ver algúns fragmentos do comentado máis arriba.

OPINIÓN PERSOAL:

Neste caso a miña opinión ven moi influída pola miña paixón por SLAM DUNK (considerado en multitude de evento e medios o mellor manga de todos os tempos). No DVD temos a posibilidade de ver a un auténtico mestre do pincel traballando sobre unha páxina ou sobre unha lona cun pincel de case 2 metros de alto. Tamén se aprecia velocidade no seu traballo e a facilidade coa que manexa as escalas e proporcións. Dúas horas imprescindibles para calquera fan de Inoue nun DVD reproducible en todas as rexións, aínda que coa pega de non ter subtítulos en ningún idioma e ter que velo todo en xaponés.

COPIC drawing pen F0

2010-07-23T15:14:00.001-07:00

Como xa comentabamos no artigo anterior, imos ver agora as plumas de debuxo de COPIC, onde a diferenza máis notable coas de TACHIKAWA é que estas non son recargables.

As DRAWING PEN F0 de Copic son plumas non recargables coa punta de aceiro inoxidable, cuxa principal característica é que soportan os rotuladores ao alcohol. A cabeza das COPIC é similar a unha pluma SCHOOL PEN e está dipoñible en dúas versións: F01DP (de 1 mm de espesor) e a F02DP (de 2 mm de espesor). No primeiro modelo, bastante máis difícil de conseguir, tamén temos unha versión en sepia F01SDP. Segundo a web de COPIC, a carga de tinta ten unha duración estimada de 1 200 m, no modelo de trazo fino, e a metade no de trazo ancho (isto si que non o comprobei, polo que teremos que fiarnos do fabricante). O tempo de secado estimado é de 30 minutos e, dentro das precaucións e mantemento da ferramenta, podemos destacar o importante que é poñerlle o capuchón cando non se use (aínda que sexan só 10 minutos), limpar a punta da pluma cun pano de papel, no caso de que comece a facer liñas de maior espesor, ter paciencia ao principio á hora de sacar liñas estables e fluídas (tarda en adaptarse ao teu ritmo) e, por último, lembrar que é de espesor constante, polo que non debemos forzar a pluma para conseguir liñas de maior grosor, como no caso das de TACHIKAWA.

Cada unidade anda polos 4$ e 6$ e pódense atopar facilmente na rede, xa que están dispoñibles no catálogo europeo e americano de COPIC. O debuxo de exemplo desta vez está feito sobre a MOLESKINE POCKET SKETCH NOTEBOOK, tintado co F01DP e para as zonas negras usei o COPIC MULTILINER SP BRUSH, do que xa teremos ocasión de falar noutro artigo.

OPINIÓN PERSOAL:

Pois unha das cousas que máis me sorprende é que non ten unha resistencia demasiado boa aos COPIC, xa que sen, un tempo de secado moito máis amplo do que indica o fabricante ou se borras o lapis pouco antes de aplicar os rotuladores, a tinta sofre bastante o esfumado. Por outra banda, pásalle o mesmo que a todas estas ferramentas “prefabricadas” nas que a tinta é pouco escura e consistente, e vólvese moi cincento no momento de borrar por riba dela.

Á hora de comparala co modelo de TACHIKAWA, quedo con este último, xa que o feito de non dar variación de liña, non ser recargable e ter un deseño e acabamento de baixa calidade fai das DRAWING PEN F0 unha ferramenta prescindible na nosa lata.

TACHIKAWA school g pen

2010-07-23T15:04:00.001-07:00

Volvemos recuperar outro artigo do vello blog para darlle unha nova revisión, nesta ocasión as plumas recargables de TACHIKAWA. E aproveitaremos para comparalas no seguinte artigo coas de COPIC.

A compañía xaponesa TACHIKAWA (www.tachikawa-net.co.jp) foi fundada en 1935 por Tatsukawa Taketoshi e está especializada na fabricación de elementos de fixación, embalaxe e plumas caligráficas. Ademais das súas fabricas en Xapón, dispón tamén doutras en Taiwán e China.

As plumas TACHIKAWA divídense en dous modelos: a SCHOOL G e a SCHOOL, a diferenza entre as dúas plumas é a súa cabeza, a primeira utiliza unha cabeza de pluma G PEN (a pluma máis habitual no manga) cun trazo que varía entre 0,2 e 0,5 mm; e a segunda usa a cabeza de pluma SCHOOL, cun trazo que varía entre 0,2 e 0,3 mm.

Na imaxe inferior podedes ver o resultado ao tintar cunha SCHOOL G e aplicarlle cor, despois dun tempo prudente de secado, cos COPIC SKEETCH. Na última imaxe apréciase que a tinta non sofre ao pasarlle por riba rotuladores ao alcohol.

Os dous modelos son recargables, levan un cartucho similar ao que usan os pinceis caligráficos pocket e cada recarga leva dúas unidades. A tinta é resistente á auga, opaca e de secado rápido.

O modelo SCHOOL G ten unha versión en sepia, onde o capuchón da pluma é desta cor. Este modelo dispón, evidentemente, dos seus propios recambios (que son compatibles co outro modelo).

As plumas pódense atopar facilmente en tendas en liña e andan entre os 5$ e os 8$. Os recambios atópanse desde 3$.

OPINIÓN PERSOAL:

Eu utilizo estas plumas desde fai uns cantos anos, e estanse a converter en imprescindibles para os traballos de campo e ata unha auténtica comodidade para traballar no estudio, pola súa limpeza, variedade de trazo e as súas recargas, que evitan os molestos trazos de liñas paralelas cando está quedando seca a pluma tradicional. Ademais, dispón dun sistema antigoteo, isto quere dicir que é moi difícil que escorreguen pingas non desexadas sobre os nosos debuxos; pero tamén é verdade que, se leva algún que outro golpe ou meneo, chospe tinta como calquera outra, polo que hai que ter coidado neste aspecto. Pola parte negativa, que tamén as teñen, debemos sinalar a enorme presión que hai que facer para arrincar o máximo de espesor de liña, que fai que se che cansen as mans facilmente, e o acabamento áspero que deixa ao tintar, que se nota logo ao escanear.

lapis COL-ERASE de PRISMACOLOR

2010-06-18T02:26:00.001-07:00

Volvemos recuperar e completar un dos artigos da anterior versión de LDF, os COL-ERASE de PRISMACOLOR.

Estes lapis de cores están pensados para o seu uso no ámbito da ilustración e da animación, grazas ás súas dúas calidades principais: a robustez da súa mina e a súa facilidade para borrarse (que é o principal problema que ten traballar cos lapis de cores).

PRISMACOLOR (http://www.prismacolor.com/) é unha liña de material de debuxo creada orixinalmente por BEROL no 1938 e que na actualidade é fabricada pola empresa americana SANFORD (responsable tamén dos famosos rotuladores SHARPIE) e que son unha división da corporación NEWELL RUBBERMAID (donos de DYMO, PAPERMATE, PARKER, UNIBALL, ROTRING, BEROL, FABER CASTELL USA ou WATERMAN).

Como diciamos arriba, agora mesmo os COL-ERASE son distribuídos por PRISMACOLOR, pero na foto de portada podedes ver as dúas caixas, a totalmente branca de SANFORD e unha versión máis vella de cando os comercializaba FABER-CASTELL. Os lapis veñen en pack de 12 ou 24 cores (aínda que se poden adquirir individualmente). Na imaxe inferior podedes ver toda a gama de cores e os seus números de referencia.

Centrámonos neste caso nos modelos LIGHT BLUE 20068 e COPY NOT 1298, este último fóra dos packs de cores é máis difícil de atopar. Na gráfica inferior pódese ver unha proba da súa baixa resistencia ao borramento con respecto a outros lapis azuis como os KARISMACOLOR de BEROL, os POLYCHROMO de FABER CASTELL ou as minas MULTI8 de 2 mm de PENTEL.

OPINIÓN PERSOAL:

Unha vez ben probados, hei de dicir que os COPY NOT son máis ben de pouca utilidade, estes lapis foron creados no seu momento para a animación sobre acetato, xa que non eran reproducibles ao fotocopialos nin escanealos (ao igual que as guías azuis dos papeis preparados para a BD); máis que nada porque practicamente non se ven, e punto. Un pode quedar cego probando a tintar por riba deles. Outra cousa son os LIGHT BLUE, este lapis é do melloriño que usei: non ensucia, non é moi caro (pódelos atopar por menos dun euro), non é graxo, bórrase perfectamente, case non se desafía, marca ben e case non molesta no escaneamento. Mesmo a goma que trae por detrás borra decentemente sen estragar moito o papel (aínda que non recomendo usala).

COPIC opaque white

2010-06-18T02:17:00.001-07:00

Neste artigo veremos a COPIC OPAQUE WHITE, a tinta branca de pigmentos con base de auga que comercializa a empresa xaponesa TOO dentro dos accesorios da súa gama de rotuladores COPIC.

A COPIC OPAQUE WHITE ten como principal uso dar brillos, luces e relevos ás ilustracións feitas cos rotuladores, ten a vantaxe de que non se esfuma coas cores base, deixando unha liña definida e clara e mantendo a súa opacidade en calquera tamaño de superficie, despois do tempo de secado. Outro dos seus usos é o de retocar os traballos a tinta en branco e negro. Unha vez aplicada con pincel, límpase facilmente con auga morna nada máis.

A tinta ven dentro dun bonito bote de cristal de 30 cc e o seu prezo varía entre os 8$ e 12$. Na imaxe inferior podedes ver o antes e despois de aplicar a OPAQUE WHITE nun debuxo de TRASMALLO feito sobre COTMAN WATER COLOR PAPER de WINSOR & NEWTON (300 gsm), tintado coa punta fina do pincel FD-501 de ZEBRA e coloreado cos rotuladores NEOPIKO2 de DELETER.

OPINIÓN PERSOAL:

A verdade é que non é fácil atopar tintas brancas pensadas para estes usos, outras opcións como as témperas ou o guache non dan tan bo resultado, como iremos vendo noutros artigos; polo que se agradece este tipo de material. Malia todo, ten o problema de ser bastante caro, pero pódese atopar facilmente, xa que se distribúe

pinceis caligráficos PILOT

2010-06-18T02:12:00.001-07:00

Unha das posibilidades cando queremos traballar con pincel é o uso do FUDE BRUSH PEN ou pincel caligráfico recargable. Neste artigo imos analizar os que nos ofrece a empresa xaponesa PILOT.

PILOT (http://www.pilot.co.jp/) foi fundada por Ryosuke Namiki, creador da punta dourada para estilográficas, no 1918 baixo o nome de Namiki Manufacturing Co.

Máis tarde, 20 anos despois, a compañía cambia o nome por Pilot Pen Co., Ltd., converténdose nunha das marcas de maior prestixio na fabricación de material de debuxo.

Existen 3 modelos de pinceis caligráficos PILOT, clasificados polo seu tamaño:

S-100FDB-B, onde o primeiro B é de BOARD (ancho), sendo este o tamaño máis grande. Ten a etiqueta de cor amarela.

S-50FDM-B, onde o M é de MEDIUM (medio), sendo este o tamaño intermedio. Ten a etiqueta de cor laranxa.

S-50FDF-B, onde o F é de FINE (fino), sendo este o tamaño máis pequeno. Ten a etiqueta de cor verde.

Como diciamos arriba, este pincel é recargable, onde a carga é o mango enteiro e as recargas de tinta chinesa, chamadas 15FD-B, se substitúen retirando a arandela branca e facendo presión entre o mango e a cabeza.

Na imaxe inferior podemos ver os tres modelos, os dous primeiros (board e medium) están sen estrear (teñen as puntas brancas, xa que aínda non absorberon carga); e o último (fine), co cal fixen a ilustración da dereita sobre unha MOLESKINE SKETCH NOTEBOOK. Na imaxe inferior da esquerda vese o modelo ancho desmontado e máis abaixo as instrucións de carga que acompañan a cada pincel.

OPINIÓN PERSOAL:

Os pinceis de PILOT son case iguais que os que ofrece PENTEL na mesma gama (que máis adiante veremos noutro artigo). PILOT ofrece outros pinceis, como os pocket (de peto) ou os double nib (dobre punta) de maior rixidez e quizais máis doados de manexar no caso de non ter moita experiencia con este tipo de ferramenta.

Outro dos maiores problemas que teñen estes pinceis é a pouca opacidade da súa tinta. Na imaxe inferior engadín un PUAR feito a pluma (a MARU 2586 de ZEBRA) e tinta chinesa (BOMBAY BLACK de DR. PH. MARTINS), tras 24h de secado borrei o lapis cunha MONO PLASTIC ERASER de TOMBOW e pódese apreciar o mal que resiste a tinta a auga do pincel en comparación co traballo a pluma, deixando claros e zonas grises.

Por outra banda, tras darlle cor cos rotuladores COPIC SKEETCH de TOO e brancos con COPIC OPAQUE WHITE pódese observar como a parte feita cos PILOT resiste perfectamente as pinceladas dos rotuladores con base de alcol, mentres que a parte feita con tinta chinesa BOMBAY BLACK se ve esfumada, manchando a ilustración e poñendo en cuestión a súa capacidade para resistir os rotuladores.

Os pinceis pódense atopar entre 6$ e 12$, dependendo do modelo, e as recargas sobre 4$ en diversas tendas en liña, xa que unicamente se distribúen en Xapón e non están dispoñibles no catálogo europeo ou americano de PILOT.

goma borrar MONO tombow

2010-06-17T14:48:00.001-07:00

Neste caso imos falar da MONO PLASTIC ERASER, a goma de borrar franquía da compañía xaponesa TOMBOW e unha das máis usadas entre os profesionais xaponeses.

TOMBOW PENCIL CO. LTD. é a responsable da fabricación destas gomas (http://www.tombow.com/).

A empresa, fundada en Toquio no 1913, tiña como principal actividade a fabricación de lapis, aínda que nos anos 50 comeza coa fabricación de bolígrafos e demais accesorios. Nesta última década expandiuse tamén a outros países como Tailandia ou Vietnam.

A goma de borrar é de PVC e témola en tres tamaños PE-01A 43x17x11 mm, PE-03A 55x20x11 mm e a PE-04A 55x23x11 mm.

A maiores, na mesma calidade, podemos desfrutar dos portagomas de precisión MONO ZERO, onde dispoñemos de dous modelos, EHKUR, de punta redonda de 2,3 mm de diámetro, e EHKUS, de punta rectangular de 2,5x5 mm. Estes portagomas pódelos coller en tres cores, estándar (branco, negro e azul), prateado ou negro.

Outros dous modelos que tamén podes atopar e que ofrecen un bo resultado son as súas versións LIGHT en dous tamaños (52x16 mm e 72x22 mm) e o modelo sen area NON DUST de 40x26 mm.

Na foto inferior podes ver a NAOKI URASAWA (20th CENTURY BOYS e MONSTER) traballando no seus estudio e usando as MONO PLASTIC ERASER.

OPINIÓN PERSOAL:

Unha das cousas que máis me gustan destas gomas é que son moi brandas e dun tacto agradable. Ademais, non soltan practicamente residuos, facendo unha soa miga da zona borrada, fácil de limpar e sen estragar o papel en ningún momento. A isto sumamos as de precisión, que sempre que queres borrar unha parte pequena acabas levando medio debuxo, e estes modelos son a solución a ese baleiro no mundo das gomas.